Өлзийхутагийн Зоригзаяа

Аймгийн алдарт уяач Гэндэнваанчигийн Төмөр-Очирын туслах уяачаар гараагаа эхэлсэн Өлзийхутагийн Зоригзаяа 14 айргийг аймгийнхаа баяраас авчээ. 1999 оны зун Г.Төмөр-Очир, Ө.Зоригзаяа нар хоёр хурдан соёолонтой. Аймагт хоёулаа айрагдаж, дараагийн том наадамд дахин хоёулаа айрагдсан юм. Аймгийн чанартай том наадмаас нэг жилийн дотор дөрвөн айраг авсан. Энэ хоёр баярт хоёуланд нь Зоригзаяагийн халиун үрээ түрүүлж байсан юм. Тэр жил аймгийнхаа баяр наадмаас ах дүү хоёр долоон айраг авсан юм. Халиун морийг Отгон сумын Бат-Юнрэнгийн Чинзоригт ихэр юм шиг адилхан хоёр цоохор морь өгч оронд нь авсан. Сүүлд улсын алдарт уяач Ж.Баянжаргалд очжээ. 

Сүхрагчаагийн Нямзагдын унаган хээр азарга 2007 онд аймагтаа түрүүлж, Зоригзаяагийн нэрээр аймагтаа дахин хоёр удаа айрагджээ.