2024 оны улсын баяр наадмын есөн түрүү хүлэг
Ардын хувьсгалын түүхт 93 жилийн ой, үндэсний их баяр наадамд түрүүлсэн хүлгүүдийн фотог уншигч та бүхэндээ хүргэж байна.
1. Азарганы түрүү Булганы Гурванбулаг Сэрээнэнгийн Гал-Эрдэнийн Нандин халзан. Сашкагийн Эрдэнэбат уясан. Хөвсгөл аймгийн Тариалан сумын харьяат Ж.Элбэгсайханы нэд хамаах Араб азарганы үр. Даага Орхон аймгийн 40 жилийн ойд дөрөвт, 2021 онд соёолон Сэлэнгэ аймагт болсон төвийн бүсийн уралдаанд хязаалан түрүүлсэн. 2022 онд хавчиг азарга улсын наадамд наймд, Хотгойдын хурдад түрүүлсэн. 2023 онд үндэсний их баяр наадамд зургаалаад Төв аймгийн 100 жилийн ой улсын бүсийн уралдаанд аман хүзүүдсэн.
Их нас. Ховд аймгийн Чандмань сумын харьяат Батчулууны Ерөөлтийн халтар морь. Унаган адуу. Шүдлэн 2021 оны Ховд аймагт болсон улсын бүсийн уралдаанд шүдлэн тавд, 2022 онд Сүхбаатар аймгийн 80 жилийн ой зүүн бүсийн уралдаанд хязаалан түрүүлсэн. Өнөө жил Партизаны наадамд хол түрүүлээд, улсын наадамд түрүүлж, Ламын гэгээний даншигт гуравт хурдалсан.
Соёолон. Булган аймгийн Сэлэнгэ сумын уяач Хишиг-Очирын Бөхбатын зээрд. Тод манлай уяач Даариймаагийн Чулуунбатын адууны удамтай. Хязаалан үрээ улсын баяр наадамд айрагдсан. 2024 оны үндэсний их баяр наадамд түрүүлсэн.
Хязаалан. Дундговь аймгийн Эрдэнэдалай сумын харьяат Батсуурийн Чинзоригийн хээр. Аймгийн алдарт уяач Сосорбурамын Одгэрэл уясан. Манлай уяач Загджавын Мэндсайханы унаган адуу. Төв аймгийн Мөнгөнморьтын наадамд шүдлэн түрүүлсэн.
Шүдлэн. Өвөрхангай аймгийн Хархорин сумын харьяат Цэрэндэндэвийн Дагвасүрэнгийн Хул. Аймгийн алдарт уяач Дагвасүрэнгийн Гомбосүрэн уясан. Даагандаа үндэсний их баяр наадамд айрагдсан.
Даага. Төв аймгийн Бүрэн сумын харьяат Хүрэлбаатарын Улам-Өрнөхийн Хээр.
Сонгомол дээд. Завхан аймгийн Тосонцэнгэл сумын харьяат Сэрээтэрийн Баярсайханы Бор. 2022 2024 оны үндэсний их баяр наадмын түрүү, 2023 оны айраг. 2021 оны Ховдын бүсийн түрүү, 2022 онд улсын баярт түрүүлээд Их хурдад түрүүлсэн. 2023 оны Завханы бүсийн түрүү, 2024 онд улсын наадам, Говьсүмбэрийн бүс, Орхоны бүсэд түрүүлсэн.
Сонгомол дунд. Өвөрхангай аймгийн Хархорин сумын харьяат Янгүгийн Содбаатарын Халтар. Тод манлай уяач Т.Ихбаяр уясан. Далхаагийн Мөнгөнхуягийн наган хар гүүний үр. Б.Наранбатын Адепто хээр азарганы төл. Даагандаа зүүн бүсэд айргийн 3-т хурдалсан.
Сонгомол бага. Өвөрхангай аймгийн Хархорин сумын харьяат Хаянхярваагийн Гарьдмагнайн Хээр.
