Завханмандалын Нямсүрэнгийн хотон хээр

Завханмандал сумын Цэгмидийн Нямсүрэнгийн Хотон хээр морь аав Цэгмидийн унаган адуу. 1983 онд даага сумандаа аман хүзүүдэж, соёолон болтлоо түрүүлсэн. Хавчиг морь өнжөөд, 1989 онд намрын баяр сургуулийн 50 жилийн ойд аман хүзүүдсэн. 1990, 1991 онд сумандаа дараалан аман хүзүүдэж, 1992 онд түрүүлсэн. 1993 онд Ургамал сумын наадамд айрагдаж, Завхан аймгийн 70 жилийн ойд их насны морь будилахад эхний тасарсан морьдод айрагдаад хасагдсан. Хойтон жил нь сумандаа түрүүлж, Эрдэнэхайрханд айрагдсан. 1995 онд сумандаа дахиан түрүүлж, Сар хайрханы даншигт 21-т оржээ. 1996 онд сумандаа түрүүлж, Дөрвөлжин сумын хөдөлмөрийн баатруудын наадамд түрүүлж, 1997 онд сумандаа ихэд нийлээд тав дахь түрүүгээ авч, Ургамал сумын наадамд түрүүлэв. 1998 онд 17 настай морь Завханмандал сумын сургуулийн 60 жилийн ойд хөл доголон уралдаж наймд хурдалж зодог тайлжээ. Зөвхөн сумандаа найм түрүүлж, гурав аман хүзүүдсэн хүлэг юм.