Сонгины хар азарга

ХИЛЭН ХАР АЗАРГА

Аварга өргөн цээжээрээ адуун сүргээ халхалсан

Арслан сайхан дэлээрээ араатныг цочоож айлгасан

Аатай хаттай туурайгаар агаар самардан догширсон

Алтан бүрээ хамраараа анир үнэрлэн сортолзсон

Адтай галтай нүдэндээ алсыг харан дүүхэлзсэн

Адуун сүргээ тойроод агсарч цамнаж хуйхарсан

Алиман тольт туурайндаа аугаа хурдан тэмдэгтэй

Атриат уран тагнайндаа нэгээр илүү нугалаатай

Тэгш төрсөн биендээ дөрвөлжин хийцийн зурагтай

Тэнцүү уран мөчиндөө тэшсэн жороо явдалтай

Тал саран туурайгаар тамгалж барлан давхисан

Тансар хилэн зүсээрээ түмнээс сондгойрч гялалзсан

Түүхийн буурал хуудасны тэг дунд нь холилдож

Төрсөн тэлсэн нутгийнхаа газар усаар зарлагдаж

Түрүү айраг булаалдаж тунгалаг хөлсөө асгаруулж

Төр түмнийхээ буяныг тогтоож байдаг түмэн эхээ

Сартуулын Б.Улаанхүү