Баярмагнайн Мөнхбатын хонгор морь

Сүүлийн хэдэн жил Завхан чигийн наадамд өнгөнд уралдаж байгаа энэ хурдан морь ММСУХ-ны тэргүүн Дашзэвэгийн Дагвадоржийн унаган адуу юм. Аймгийн алдарт уяач 2021 оны улсын шилдэг уяач Яруу сумын "Яруу хээр" морин спорт уяачдын холбооны тэргүүн Шүхэржавын Баярмагнайн хүү Мөнхбатын нэр дээр уралддаг. Соёолон анх уягдаж Завхан аймгийн Яруу суманд болсон аймгийн хаврын бүсэд айргийн гуравт хурдалж, Нөмрөг сумын 100 жилийн ойд түрүүлсэн. 2024 онд хавчиг морь Сонгино суманд болсон хаврын бүсэд түрүүлж төвийн бүсэд гуравт давхисан. Зун нь Завхан аймгийн наадамд  гуравт, Баянтэс сумын 100 жилийн ойд аман хүзүүдэж, Сонгино сумын 100 жилийн ойд гуравт давхисан. Энэ морины эцэг эх салаагүй ах нь Өвөрхангайд болсон улсын бүсэд айрагдаж үндэсний их баяр наадамд хоёр удаа 10 дотор давхижээ. Дүү нь Завханы 100 жилд шүдлэн аман хүзүүдэж энэ жил улсын баяр наадмыг өнгөлж байгаад үзүүр дээрээ унжиж 9-д давхижээ.